حوزہ نیوز ایجنسی کی رپورٹ کے مطابق، آیت اللہ العظمیٰ شیخ بشیر حسین نجفی سے عراق میں یورپی یونین کے سفیر کلیمینس سیمٹنر نے اپنے وفد کے ہمراہ نجف اشرف میں واقع مرکزی دفتر میں ملاقات کی۔ اس ملاقات کے دوران عالمی سطح پر انسانی نوعیت کے مختلف امور اور خطے کی موجودہ صورتِ حال پر تبادلۂ خیال کیا گیا۔
ملاقات میں آیت اللہ العظمیٰ شیخ بشیر حسین نجفی نے اس بات پر زور دیا کہ یورپی یونین کا سفارتی مشن عراق میں اپنی سرکاری ذمہ داریاں اس انداز سے انجام دے کہ وہ اقوام کی حقیقی خدمت کا ذریعہ بنیں۔ انہوں نے کہا کہ یورپی مشن کو چاہیے کہ وہ عراق میں اقتصادی، علمی اور سماجی شعبوں سمیت مختلف میدانوں میں بہتری کے لیے مؤثر کردار ادا کرے۔
آیت اللہ العظمیٰ شیخ بشیر حسین نجفی نے اقوام کی شناخت اور تہذیبی تشخص کے احترام پر خصوصی توجہ دلائی اور کہا کہ عراقی عوام ایک قدیم اور عظیم تہذیب کے وارث ہیں، جن کی تاریخ انسانی تمدن کے ابتدائی ادوار تک پھیلی ہوئی ہے، لہٰذا بین الاقوامی اداروں کو عراق کے ساتھ تعامل میں اس حقیقت کو پیشِ نظر رکھنا چاہیے۔
اس موقع پر یورپی یونین کے سفیر کلیمینس سیمٹنر نے عراق میں اپنے سفارتی مشن کی سرگرمیوں اور ذمہ داریوں سے متعلق بریفنگ پیش کی اور کہا کہ یورپی یونین عراق کے استحکام، ترقی اور عوامی فلاح کے لیے تعاون کو اہمیت دیتی ہے۔ انہوں نے آیت اللہ العظمیٰ شیخ بشیر حسین نجفی کی جانب سے حسنِ استقبال اور ملاقات کے لیے وقت دینے پر شکریہ ادا کیا۔
یہ ملاقات باہمی احترام، مکالمے اور انسانی اقدار کے فروغ کے تناظر میں ایک اہم پیش رفت قرار دی جا رہی ہے۔
آپ کا تبصرہ